له‌ژیر چاودێرى نێچیرڤان بارزانى سه‌رۆكى حكومه‌تى هه‌رێمى كوردستان و به‌ هاوكارى وه‌زاره‌تى رۆشنبیرى و به‌ پاڵپشتى فه‌رمانگه‌ى په‌یوه‌ندییه‌كانى ده‌ره‌وه‌ى حكومه‌تى هه‌رێم، گروپى ژێدارى كوردستان بۆ كۆرِاڵ و میوزیك كه‌ له‌ 69 موزیكژه‌ن و ده‌نگبێژ پێكهاتبوو له‌گه‌ڵ 31 ده‌وڵه‌ت به‌ فه‌رمى به‌شداریان له‌و فبستیڤاڵه‌ نێوده‌وڵه‌تییه‌ كرد.

رێكه‌وتی 5 ته‌موز/ یۆلیۆ فیستیڤاڵ له‌ یه‌كێك له‌ شوێنه‌واره‌ به‌ناوبانگه‌كانى ڤییه‌نا شتیڤانزدۆم ده‌ستى به‌ كاره‌كانى كرد. له‌ به‌راییدا ده‌سته‌ى سه‌رۆكایه‌تى فیستیڤاڵ به‌فه‌رمى به‌خێرهاتنى  فه‌له‌كه‌دین كاكه‌یى وه‌زیرى رۆشنبیرى و فه‌لاح مسته‌فا به‌رپرسى په‌یوه‌ندییه‌كانى ده‌ره‌وه‌ى حكومه‌تى هه‌رێم و تاریق ئاکره‌یی باڵیۆزی ئێراق له‌ وه‌ڵاتی نه‌مسا كردو تیشكیان خسته‌ سه‌ر به‌رنامه‌ى فیستیڤاڵ.

له‌گۆڵدن هۆڵ پێشبرِكێى تیپه‌كان ده‌ستى پێكردو له‌به‌شى سترینگ ئۆركێسترا تیپى ژێدارى كوردستان بۆ میوزیك توانیان پله‌ى دووه‌م به‌ده‌ست بێنن و تیپى كۆرِاڵى كچانیش توانیان پله‌ى چواره‌م به‌ده‌ست بێنن. به‌مه‌ش گرووپى ژێدارى كوردستان بۆ كۆرِاڵ و میوزیك له‌ دووه‌مین فیستیڤاڵى جیهانى توانییان دوو خه‌لاَتى نێوده‌وڵه‌تى له‌ بوارى میوزیك و كۆرِاڵ به‌ده‌ست بێنن.

تیپى ژێدارى كوردستان به‌ رابه‌رِایه‌تى موزیكژه‌ن عه‌بدوڵلاَ جه‌مال (ع.ج.سه‌گرمه‌) و تیپى كۆرِاڵى كچانیش به‌ رابه‌رایه‌تى خاتوو كۆمیكۆ ئاكامۆراى ژاپۆنى له‌و فیستيڤاڵه‌ به‌شدارییان كرد.